ទូរស័ព្ទ Galaxy Note ដែលនឹងត្រូវបានគេចេញបង្ហាញនៅថ្ងៃអង្គារស្អែកនោះ មានលក្ខណៈធំជាងទូរស័ព្ទទំនើប ប៉ុន្តែតូចជាងកុំព្យូទ័របន្ទះស្ដើង ដែលភ្ជាប់មកជាមួយនូវអេក្រង់ទំហំ ៥,៣អ៊ីញ ស្ថិតក្នុងត្រកូល Galaxy ផងដែរ។
ទូរស័ព្ទស៊េរីថ្មីនេះ ក៏បានភ្ជាប់មកជាមួយនូវឧបករណ៍សម្រាប់សរសេរដ៏ទំនើបហៅថា «S Pen» ដែលអាចឲ្យអ្នកប្រើប្រាស់សរសេរអក្សរនៅលើអេក្រង់ ហើយវាដំណើរការជាមួយ CPU ១,៥ជីហ្កាហឺតចំនួន ២ដើម និងដំណើរការជាមួយកម្មវិធី Android Gingerbread របស់ក្រុមហ៊ុន Google។
ទូរស័ព្ទទំនើបថ្មីរបស់ក្រុមហ៊ុនកូរ៉េខាងត្បូងមួយនេះ នឹងបំពាក់មកជាមួយនូវសេវាភ្ជាប់បណ្ដាញជំនាន់ទី ៤ ឬ 4G (LTE) ខណៈទូរស័ព្ទទាំងឡាយដែលចេញលក់នៅអឺរ៉ុប និងហុងកុងកាលពីខែមុននោះ ដំណើរការជាមួយបណ្ដាញឥតខ្សែជំនាន់ទី ៣ ឬ 3G។
លោក ស៊ីន ជុងឃ្យុន នាយកប្រតិបត្តិផ្នែកអាជីវកម្មទូរស័ព្ទរបស់ក្រុមហ៊ុន Samsung បានថ្លែងថា៖ «Galaxy Note គឺជាទូរស័ព្ទស៊េរីថ្មី ទើបនឹងចេញក្រោយទូរស័ព្ទទំនើប និងកុំព្យូទ័របន្ទះស្ដើងដទៃទៀត។ វានឹងផ្ដល់ឲ្យអតិថិជននូវបទពិសោធន៍ថ្មី»។
ប្រភព៖ ភ្នំពេញប៉ុស្តិ
No comments:
Post a Comment