សំណេរជីវិត: អនុសាសន៍ធ្វើឱ្យក្មេងជាងវ័យពី វេជ្ជ. លី ចេងហ៊ុយ

ការរួមភេទយ៉ាងហោចណាស់ឱ្យ បាន៣ដងក្នុងមួយសបា្ដហ៍ នឹងអាចធ្វើឱ្យក្មេងជាងវ័យ ដល់ទៅ១០ឆ្នាំ។ នេះជាលទ្ធផលដែលទទួលបាន ពីការធ្វើអង្កេតស្រាវជ្រាវមួយ របស់អ្នកចិត្ដសាស្ដ្រជាតិស្កុដឡែន ទៅលើមនុស្សដែលសាច់ចាំ នៅវ័យក្មេងបានយូរ ប្រមាណជាង៣៥០០នាក់។ នៅក្នុងពិធីជប់លៀងអតីតសិស្សរួមជំនាន់ នៃសាលារៀនមួយ មានមនុស្សខ្លះហាក់ដូចជាមានវ័យក្មេង ជាងអ្នកខ្លះទៀតដល់ទៅ ១០ឆ្នាំ។ លោកវេជ្ជបណ្ឌិតដាវីដ វ៉ិច ជាអ្នកចិត្ដសាស្ដ្រនៅមន្ទីរ ពេទ្យរ៉ូយ៉ាល់អ៊ីឌីមប៉ើកនៅស្កុដឡែន (ចក្រភពអង់គ្លេស) មានចម្ងល់អំពី មូលហេតុនេះ។ នៅឆ្នាំ១៩៨៨លោកវេជ្ជបណ្ឌិតរូបនេះ បានប្រកាសក្នុងសារព័ត៌មាន “អ្នកវិទ្យាសាស្ដ្រថ្មី ” ទីបំផុតគាត់បានទាក់ទងជាមួយ មនុស្សប្រមាណជាង៣៥០០នាក់ ដែលមានអាយុចន្លោះពី១៨ ទៅ១០២ឆ្នាំ។ អ្នកទាំងនោះសុទ្ធតែមាន លក្ខណៈពិសេសមានរូបរាងកាយក្មេង ជាងឆ្នាំកំណើត ដែលដាក់នៅក្នុងសំបុត្រ កំណើតនិងអត្ដសញ្ញាណប័ណ្ណ។ ដើម្បីរកឱ្យឃើញការពិត អ្នកវិទ្យាសាស្ដ្ររូបនេះ បានដកចេញពីបញ្ជី ដែលចូលរួមអង្កេតនូវមនុស្សដែល ធ្លាប់មានការកែសម្ផស្ស។ លោកបានផ្ដល់កម្រងសំណួរ ទៅឱ្យអ្នកចូលរួមអង្កេត ដើម្បីដឹងអំពីជីវិតរស់នៅ ជាប្រចាំរបស់ពួកគេ។ លទ្ធផលដែលទទួលបានលោក បានសរសេរនៅក្នុងសៀវភៅមួយក្បាល មានចំណងជើងថា អាថ៌កំបាំងរបស់មនុស្ស ក្មេងជាងវ័យ។

ដើម្បីជូនជាបទពិសោធន៍សម្រាប់បងប្អូនជនរួមជាតិខ្មែរ HealthCambodida.com សូមធ្វើការដកស្រង់ចំណុចខ្លះ នៃការអង្កេត របស់អ្នកវិទ្យាសាស្ដ្ររូបនេះ។

៣ដងក្នុង១សបា្ដហ៍ ក្មេងជាងវ័យ១០ឆ្នាំ

ដើម្បីឱ្យរូបរាងកាយនៅក្មេងជាងវ័យ សាច់ចាំមិនតម្រូវឱ្យរស់នៅតមផ្លូវភេទ និងតមសព្វបែបសព្វយ៉ាងដូចអ្នក បួសនោះទេ។ សិចឬជីវភាពផ្លូវភេទប្រៀបបាន នឹងសារធាតុមួយក្នុងចំណោម សារធាតុផ្សំជាច្រើនដែលជួយ យើងឱ្យក្មេងជាងវ័យ ប្រមាណជា១០ឆ្នាំយ៉ាង តិច។ ពីព្រោះថាក្នុងចំណោមមនុស្ស ដែលសម្ភាសន៍ទាំងអស់ សុទ្ធតែមានទំនាក់ទំនងផ្លូវភេទ យ៉ាងតិចបំផុត៣ដងក្នុង១សបា្ដហ៍។ ឥទ្ធិពលជា ផ្លែផ្កាទាំងនេះត្រូវបានអះអាង ឡើងដោយការស្រាវជ្រាវជាច្រើន។ ពិតហើយ ការរួមភេទឬរួមរ័កស្នេហា ប្រៀបបានទៅនឹងលំហាត់ប្រាណ មួយ ដូចលំហាត់ដ៏ទៃទៀតដែរដែលជួយទ្រទ្រង់រាងកាយបាន។ រីឯសម្ព័ន្ធផ្លូវភេទសុខដុមអាច ជាសទិសន័យជាមួយនឹង ជីវិតរីករាយ។ ហើយ ដែលមនុស្សរីករាយពិតជា មានទឹកមុខក្មេងជាងពេលណាៗទាំងអស់។
ឥទ្ធិពលផ្សេងទៀតជួយឱ្យក្មេងជាងវ័យ
អ្នកស្រាវជ្រាវក៏បានគិតផងដែរ អំពីទម្លាប់ដ៏ទៃទៀតដែល ជួយឱ្យក្មេងជាងអាយុ។ ជាអាទិ អ្នកដែលក្មេងជាងវ័យ ភាគច្រើនជាអ្នកដែលមិនជក់បារី។ ម្យ៉ាងទៀតពួកគាត់ ជាមនុស្សដែលគិតគូរយក ចិត្ដទុកដាក់ពីរបបចំណីអាហារ និងមិនសូវមានអារម្មណ៍តានតឹង (មិនសូវមានអាការស្ដ្រេស្ស)។ ប៉ុន្ដែភាគច្រើនក្នុងចំណោម ពួកគាត់ជាមនុស្សស្រឡាញ់ ជីវិតចេះរស់នៅ។ ព័ត៌មានសំខាន់មួយផ្សេងទៀត ពួកគាត់ច្រើនតែមិនទាន់ មានអ្នកបន្ដពូជពង្ស គឺមានចំនួន១៥% មិនទាន់មានកូន។ រហូតមកដល់សព្វថ្ងៃនេះ មិនទាន់មានការអង្កេតសព្វជ្រុង ជ្រោយអំពីឥទ្ធិពលនៃរបៀបរបប រស់នៅឡើយទេ។ ចំពោះមនុស្សមានមាឌតូច ឬទាបជាងកម្ពស់មធ្យម មានការពិបាកវាយតម្លៃ រកអាយុពិតរបស់ពួកគាត់ ឱ្យបានជាក់លាក់ណាស់។
លោកវេជ្ជបណ្ឌិត វ៉ិច បានបញ្ជាក់ថា មានរូបរាងកាយក្មេងជាងវ័យ មិនប្រាកដថាសុទ្ធតែផ្ដល់អត្ថប្រយោជន៍ ឬគុណសម្បត្ដិនោះ ទេ។ អ្នកដែលក្មេងជាងវ័យទាំងនេះ ជាមនុស្សមិនសូវរវៀសរវៃទេ ជាពិសេសមិនសូវខ្វល់នឹងជីវិត វិជ្ជាជីវៈប៉ុន្មានទេ។ លើសពីនេះទៅទៀតពួកគាត់ ច្រើនតែមានបញ្ហាទំនាក់ទំនងមិនល្អ ជាមួយនឹងកូនៗ របស់គាត់។
ជីវិតមនុស្សចរិកប្លែក
នៅឆ្នាំ១៩៩៥ លោកវេជ្ជបណ្ឌិត វ៉ិច បានចេញផ្សាយសៀវភៅមួយក្បាល ទៀតដែលអត្ថាធិប្បាយអំពីមនុស្សចរិកប្លែក។ លោក បានសម្ភាសន៍មនុស្សចរិកប្លែក ប្រមាណជាជាង១០០០នាក់ ទាក់ទងនឹងទម្លាប់រស់នៅ របស់ពួកគាត់។ មនុស្សចរិកប្លែក ជាមនុស្សមិនគោរព ប្រពៃណី មិនរមទម្យ ឆ្ងល់ច្រើនមនោគតិនិយម និងមានគំនិតច្នៃប្រឌិតខ្ពស់។ មនុស្សជំពូកនេះចូលចិត្ដគិតចង់ ស្រោចស្រង់ពិភពលោក ឬចង់ ធ្វើនេះអភិវឌ្ឍន៍នោះ ដោយមិនសូវខ្វល់ពី ករណីណាមួយឡើយ។
ការសន្និដ្ឋានរួម បានបង្ហាញថាមនុស្សក្រុមនេះ មានសុខភាពល្អ។ ដោយសារពួកគាត់ទៅជួបគ្រូពេទ្យ ព្យាបាលយូរៗមួយដង ជា មធ្យម៨ឆ្នាំមួយដងហើយមានអាយុវែង រស់បានក្មេងយូរជាង ក្រុមមនុស្សដ៏ទៃ ប្រមាណពី៥ ទៅ១០ឆ្នាំ។ អាចពន្យល់បានថា ដោយសារពួក គាត់មិនសូវខ្វាយខ្វល់ ច្រើននិងមិនសូវស្ដ្រេស្ស ឬមួម៉ៅ ដូចអ្នកដទៃទៀត។
ព័ត៌មានមួយចំនួន ដែលសរសេរនៅក្នុងសៀវភៅ នេះហាក់ដូចជាមិនស្របទៅនឹងសៀវភៅ “ អាថ៌កំបាំងរបស់មនុស្សក្មេងជាង វ័យ ” របស់គាត់ឡើយ។ ព្រោះថាគាត់បានអង្កេតឃើញថា មនុស្សចរិកប្លែកភាគច្រើន ជាអ្នកមិនទាន់រៀបការ ឬនៅលីវជ្រាលវ័យ។ ពួកគេ ងាយចាប់ចិត្ដស្រឡាញ់និងមានស្នេហា ប៉ុន្ដែពួកគាត់ពិបាកសម្ដែងកាយវិការ ស្និតស្នាលនិងរក្សាទំនាក់ទំនង ស្ថិតស្ថេរជាមួយអ្នកណាម្នាក់។ ពោលគឺពួកគាត់ចង់នៅតែម្នាក់ឯងជាង។
តាមរយៈកិច្ចអត្ថាធិប្បាយមកនេះ ហាក់ដូចជាមានសំណួរពីរ ដែលត្រូវគិតសម្រាប់ជីវិត គឺតើចង់ឱ្យ មានរូបរាងក្មេងជាងវ័យដោយរួមភេទជាប្រចាំ ឬក៏រស់នៅលីវចរិកប្លែក រហូតដល់វ័យចាស់?
ការរួមភេទ មានគុណសម្បត្ដិ និងមានគុណវិបត្ដិ
ការរួមភេទ ដែលយើងកំពុងលើកឡើងនេះ គឺសំដៅទៅការរួមភេទមានសុវត្ថិភាព មិនឆ្លងមេរោគកាមរោគ និងជម្ងឺអេដស៍ ពោលជាស្នេហាមួយទល់នឹងមួយ។
ពេលរួមភេទ អ្នកប្រព្រឹត្ដមានអារម្មណ៍ពុះកញ្ជ្រោល ឬប្រែប្រួលខ្លាំង។ជារួមការបបោសអង្អែល ថ្នាក់ថ្នមឱ្យគ្នា ពេលរួមស្នេហា នឹងគ្នាផ្ដល់អត្ថប្រយោជន៍ ដល់សុខភាពទាំងផ្លូវកាយ ទាំងផ្លូវចិត្ដនិងជីវិតសុភមង្គលគូស្វាមីភរិយា។ ថ្វីត្បិតតែការរួមភេទ ជួយឱ្យមនុស្សមានរូបរាងកាយក្មេងជាងវ័យ និងមានអាយុវែងប៉ុន្ដែវាក៏ អាចបង្កើនការលេចឡើងនូវបញ្ហាជម្ងឺបេះដូង និងជម្ងឺមហារីកមួយចំនួន៕

ប្រភព៖ គេហទំព័រ សុខភាពកម្ពុជា

អនុសាសន៍ធ្វើឱ្យក្មេងជាងវ័យពី វេជ្ជ. លី ចេងហ៊ុយ

No comments: